الموسوعة الشاملة لجميع الالعاب الرعب

[max_xxx]

بسم الله الرحمن الرحيم
اخوانى اعضاء المندى الكرام

انا قاعدت فكرت قولت انا مش كل شوية انزل موضوع غير التانى عن الالعاب الرعب وكل موضوع فى كام لعبة و ده ممكن يخليكو تزهقو منى علشان كده انا قولت اعم الموسوعة ديه اللى شاملة جميع الالعاب الرعب اللى طبعا انا اعرفها يعنى ممكن تكون فى العاب تانية بس انا ماعرفهاش ان شاء الله هنبداء مع بعض الموضوع وارجو من الله ان يعجبكم بأذن الله وعلى فكرة اللى شجعنى على موضوع الموسوعة ديه اخى الكريم مصطفى مافيا جزاه الله وجزاكم كل خير
هيا بنا نبداء بأذن الله

سلسله العاب silent hill

انا حبيت ابداء بالعبة ديه لان كتير جدا كانو طالبين منى الموضوع ده وعلشان كده حبيت ابداء بيها

(silent hill1)

وطبعا هى اول جزء فى هذه النوعية المعقده من الالعاب وطبعا اللى لعب اللعبة ديه اكيد عرف ياعنى ايه كلمة اكتئاب وللاسف انا مش هاقدر اتكلم عن الجزء ده كتييييييييير لانى للاسف مش عارف اجيبة فلو سمحتم لو حد عنده الجزء ده يبقى يبعتلى الرابط بتاعة عموما تبداء اللعبة بواحد وبنته راكبين عربية طبعا انا ماعرفش هما رايحين فين المهم بتحصل حادثة ويقوم هذا الرجل من حالة الاغماء اللى كان فيها بسبب الحادثة مابيلقيش بنته يقعد ينده عليها مافيش فايده ومن هنا تبداء اللعبة لان اللعبة ديه لازم تبداء وهى مخلياك انت مش فاهم حاجة خالص المهم بيبحث الراجل ده عن بنتة مع ان المدينة اللى هو فيها مافيهاش حد الا هو لكن بيدور لحد لما بيقابل وحش صغير طبعا انت تخدك الشجاعة ونحاول تموتة لكن ريح نفسك ده مش بيموت المهم بتنتهى العملية ان الوحش ده موتك طبعا انت بتزعل جدا ازاى يموتنى لكن تتفاجئ ان كل الى انت لعبتة ده كان حلم وده يخليك تتخنق اكتر عموما كفاية عليكم كده من اللعبة ديه لانى بصراحة انا نفسى ماعرفش ايه اللى حصل بعد كده لانى ماكنتش عارف انا بالعب فعلا ولا بحلم انا راخر و اسيبكم مع الصور
اسم اللعبة : silent hill 1
الشركة: konami

silent hill 2

اسم اللعبة : بص فوق
الشركة المنتجة فى اللعبة اللى قابليها
الجزء ده ياجماعة فعلا خلانى بتعالج عن دكتور نفسانى فترة طويلة لانه معقد جدا من كل حاجة قصة اللعبة و الالغاز بس دية يمكن كانت سهلة شوية وطبعا المعقد جدا هى الشخصيات اللى فى اللعبة وخاصة الاخ اللى انت بتلعب بيه اللى هو سى جيمس اللى يقتل القتيل ويمشى فى جنازتة وطبعا اللى لعب اللعبة عارف ليه المهم الجزء ده طبعا يتميز عن الجزء السابق فى حاجات كتير منها طبعا الجرافيك و المؤثرات الصوتية و طريقة اللعب مع انها متشابة لحد كبير مع علينا نخش فى الموضوع تبداء اللعبة بأحسن مكان فى العالم والمكان ده اللى كل واحد فينا بيروحلة وهو متأكد انه مش هايسيبة الا وهو مرتاح المكان ده طبعا هو الحمام طبعا بكده تبقى اللعبة باينة من اولها ان ريحتها مش ولابد المهم بيقوم الحاج جيمس فى الحمام اللى مليان دم وبيبص لنفسة فى المراية اللى قدامة وعلى فكرة اللقطة بتاعت المرايا ديه فضلت فترة طويلة واخده احسن لقطة جرافيك فى العالم المهم تبداء انت تلعب وبيخرج جيمس من الحمام ويلاقى نفسة فى باركينج كبير المهم بيروح يقف عند سور فى الجراج ده ويبداء يعقد اللى بيلعب لانه بيقول لنفسة اسم المرسل مارى وده اسم مراتى ولكم ازاى اذا كانت هى ماتت من 3 سنوات بالمرض الخبيث اللهم احفظنا يارب طبعا ديه مش فى اللعبة المهم بيلاقى اللى مكتوب فى الجواب ان مراتة الله يرحمها بتقولة انها مستنياه فى المكان المميز بتاعهم اللى كانو بيقعدو فية قبل لما تموت طبعا لو انتو مش فاهمين حاجة اتأكدو انى انا باكتب وانا راخر مش فاهم حاجة برضة
المهم طبعا المعلم جيمس من 3 سنين كان نسى المكان ده كان ايه المهم بيقعد يفكر لحد لما بيبداء يقرر انه يروح للبحيرة اللى كانو بيقعدو عندها طبعا انا لو منة كان زمانى جريت روحت واستخبيت من الميتين اللى بيكتبو جوابات حاجة تعقد بجد طبعا اللعبة ديه بتتميز بصعوبة غير طبيعية لان الطرق بتاعتها كبيرة جدا جدا كأنك فى شارع حقيقى مليان شوارع جانبية وحاجات كتير واللعبة على فكرة طويلة جدا جدا جدا و اسيبكم مع شوية صور لحد لما اخد علاج التعقيد لانى بصراحة الدكتور محزرنى انى اجيب سيرة اللعبة ديه تانى لان هو نفسة لما حاكيتله عليها سافر يتعالج بره ادعواو ان ربنا يشفية

silent hill 3

طبعا اسم اللعبة والشرك انتو حافظتوهم فمش كل شوية نكتب
الجزء ده ياجماعة يعتبر من افضل اجزاء اللعبة فى قصتة لانه بصراحة قصتة جديده وجامده وبتخليك مش فاهم حاجة لحد اخر اللعبة تبداء تفهم حاجة كده زى فيلم saw لو تعرفوة المهم تبداء اللعبة بحبايبنا الكرام اللى حتى فى اللعب بيغيرو مننا اللى هما البنات قالو ازاى الجزء الاول و التانى البطل بتاعة راجل المهم خدو هما التاتلت لحسابهم ما علينا تبداء اللعبة ببنت وهى واقفة فى مدينة ملاهى مهجورة ومليانه دم والذى منة المهم انت بتحاول تخرج من الملاهى دية وبتقابل وحوش شكلها غريب وعلى فكرة من عيوب لعبة silent hill عموما هى ان شكل الوحوش فيها مش طبيعى ومش واقعى ما علينا المهم بعد لما بتحارب الوحوش دية بتلاقى طريق على قضبان القطار طبعا انت مابتصدق وتخش تجرى على الطريق ده ولكن طبعا لكل مجتهد نصيب وعلشان انت اجتهدت ودخلت الطريق ده بتكون المكافئة بتاعتك ان القطر بيجى يشيلك زى الباشا طبعا انت كده بتفتكر ان اللعبة خلصت اقولك لا اصل كل ده كانت الاخت بتحلم المهم مش هاحرق عليكم باقى اللعبة واسيبكم مع الصور





s

silent hill4 the room

والجزء ده ياجماعة يعتبر بالفعل من روائع شركة كونامى لانها قدمت فية اعتقد افضل ماعندها فى العاب الكمبيوتر من حيث المقدمة اللى تحسسك انك بتتفرج على فيلم مش بتلعب و قصة اللعبة اللى اكثرمن رائعة وطريقة اللعب اللى فوق الممتازة المهم اللعبة كلها بصراحة وهم وجامده جدا جدا تبداء اللعبة من الغرفة 402 ودية طبعا اللى هنرى قاعد فيها وطبعا ده مش هنرى بتاع الارسنال ده هنرى بتاع اللعبة الرعب المهم بتبداء انت تتجول بهنرى فى الغرفة لحد لما تيجى تخرج تلاقى الباب مقفول بسلاسل ولا اللى حابسين جواه شمشون الجبار المهم بتحاول انت لحد لما تخرج عن طريق الحمام وتلاقى واحده من حبايبنا كالعاده ولكن هى بتقولك كلمة غريبة جدا وه انت ايه اللى جابك فى الحلم بتاعى طبعا انت مش فاهم حلم ايه المهم وانت معاها بتقولك انها تعبانة وهاتخش الحما هى بتخش لكن انا هاسيبك تعرف لوحدك مين اللى هايخرجلك وطبعا اللعبة زى ما انا قولت فوق الممتازة وان شاء الله اللى مالعبهاش انصحة انه يلعبها بس بالنهار ومع الصور

وبكده تكون خلصت السلسلة

ننتقل بعد كده لاحد اشهر الالعاب الرعب فى العالم واللى لحد الوقتى لسه محافظه على مكانتها رغم انها خصمت الكمبيوتر من زمان و اللعبة ديه هى resident evil احد اشهر وافضل الالعاب الرعب حتى الان لانها مازلت تمتع محبيها بأجزاء جديده و يا حصره علينا احنا يابتوع الكمبيوتر اللى ماشوفناش حاجة من الجزء التالت عموما نبداء مع بعض

resident evil 1

تعتبر اللعبة ديه من الاجزاء المظلومة فى اللعبة جدا لان للاسف فى كتير منا مايعرفش عنها حاجة ويمكن انا قولت الكلام ده قبل كده فى الموضوع السابق بتاعى وطبعا شرحنا اللعبة فيه شرح كافى ووافى وعموما اللى عايز يشوفة الموضوع اسمة ان كنت تريد الكنوز كفاية كده اسيبكم مع الصور

resident evil 2

وطبعا الجزء ده هو بداية شهرة اللعبة الكبيرة لانه كان من اول انواع الالعاب المجسمة اللى بدائنا نشوفها على الكمبيوتر ونزل الجزء ده فى وقت كانت كل الالعاب الموجوده حاجة تعبانة جدا جدا ويتميز الجزء ده بأن فية شخصيتين ممكن تلعب بالشخصية اللى تريحك وكمان كل شخصية ليها طرق غير التانية ياعنى كأنك بتلعب لعبة تانية خالص وهى مكملة للجزء الاول لان فى الجزء ده الاخت كلير بتحاول تبحث عن اخوها كريس بطل الجزء الاول وطبعا بتتفاجئ بالى حصل فى المدينة ولازم فى اللعبة حتة فيلم عربى يجى لااخ ليون يقابل كلير وينقذها ويبدائو يكملو اللعبة زى مانتو عارفين ...

resident evil 3

وده يعتبر اخر جزء نزل لينا على الكمبيوتر ويمكن الجزء ده اللى يفهمة طبعا اللى لعب الجزء الاول لان البطلة بتاعتة هى هى بتاعت الجزء الاول وطبعا بتحاول تهرب من المدينة الملعونة اللى هى راككون سيتى مدينة ربنا ما يوريكم وطبعا الجزء ده يعتبر قريب جدا فى الجرافيك بتاعة من الجزء التانى وطبعا كان من الاجزاء الجميلة للعبة رغم انه كان قصير مش طويل زى لما الواحد تخيل

وبكده ياجماعة نكون خلصنا لعبة resident evil
الشركة المنتتجة علشان ماحدش يزعل : capcom


لعبة blood

تعتبر هذه اللعبة من اولى العاب الرعب على الكمبيوتر وكانت كمان اول لعبة first pirsone بعد لعبة doom تكون رعب طبعا اللعبة فى وقتها كانت حاجة ماحصليتش وكان الواحد مابيقومشش من قدامها طبعا اللعبة على ما افتكر ان واحد ميت وصحى تانى وبيبداء يحارب وحوش قوية جدا جدا ويفضل فى مراحل رهيبة جدا لكن ماتسألنيش هو رايح فين ولا جى منين واللعبة ديه نزل منها جزئين فقط على حد علمى و الجزء التانى كان اقوى بكتيير من الجزء الاول و للاسف اللعبة اصبح مالهاش اى اثر الان و لكنها كانت فى وقت من الاوقات من اقوى الالعاب الرعب

blood rayan

وهى تعتبر قدمت نوع جديد من الالعاب لانك فى اللعبة ديه بتلعب بنصف دراكولا مش بأنسان عادى زى اى لعبة ولكن العيب فى اللعبة ديه ان الجرافيك ماكنش على قد المتوى ولا طريقة اللعب وهى بتحكى عن ان نصف دراكولا كان نفسها تبقى دراكولا كامل شغل قصص اطفال عموما انا فى الاخر هاحط الرابط لاى حد بيحب اللعبة ديه وهى برده لها جزء ثانى بس بصراحة انا ماجيبتوش لانى كرهتها من الجزء الاول

noceturn

ايضا من العب اللى كتير مايعرفهاش مع ان اللعبة ديه تعتبر ممتازة جدا نظرا لانها من الالعاب ذات الافكار الجديده وكلام ده قولناه فى موضوع ان كنت تريد الكنوز

obscure

وهذه اللعبة اتمنى من كل من لا يعرفها انه يحملها ويلعبها وصدقونى مش هاتندمو لانها لعبة جامده جدا جدا جدا وكاية ان ممكن يلعبها شخصين مع بعض و اللى محتاج الرابط وشرح اللعبة موجود فى موضوع اسمة بداية طريق الظلام ان شاء الله انا اللى كاتب الموضوع برضه

alone in the dark

وهى تعتبر احد اكبر العاب الرعب فى تاريخ الكمبيوتر لان اللعبة ديه لها اسلوب خاص يختلف تماما عن باقى الالعاب الرعب فى كل شئ مثلا الاماكن اللى بندور فيها احداث اللعبة الاحداث نفسيها الالغاز لعبة تعتبر اكثر من رائعة وهى نزلها 4 اجزاء طبعا انا اتكلمت عن الجزء الرابع قبل كده ولكن مش هاقدر اتكلم على باقى الاجزاء لانى مالعبتش الا الجزء الاول وده من حوالى 12 سنة كده ربنا يعطينا ويعطيكم طولت العمر وبرضة شرحها فى موضوع ان كنت تريد الكنوز

[mazazeko]

lمشكوووووووووووووووووووور علي العبة

[ابوأنس 94]

وفين الروابط

[max_xxx]

دا تقرير

وانا هدور على الروابط فى اقل وقت

[mmmrif]

Thank You Man

[mmmrif]

Where Is The Links ?

[max_xxx]

مشكوريين......................................

على الردود

[eng_medo2009]

مشكور على الموسوعة بس كمل جميلك وحط روابطهم

[max_xxx]

ان شاء الله

ومشكوريييين